2021.4.24 (Sat)
樂翠台
天氣又轉涼，有雨大風。今天又搞聚會，明天群組成員全員到齊，認真俾面。加埋我和小英子兩個主人，總數15人，要向樓上師弟借多四張櫈撐場。派對1800開始，小英子先到地鐵站阿參買外賣，15人我係冇本事一個人搞得掂D食物。
大夥兒陸續到場，TJ在地鐵站偶遇小英子取外賣，率先到場拉開序幕，跟手是MM，FF，TK，之後PA帶來乳豬一隻，真的是出乎意料之外，CW及BK7點左右到來，正好幫手剪豬。 14人，還剩EC未到，不過佢有上半場，話左遲到。一路食一路等，2030左右EC到，人齊可以食剁椒魚頭，MM知道小英子喜歡食魚頭，專誠到我家煮俾大家食。
屋企雖然大了，15人始終都係逼，冇乜位可以郁動。 10時PA，CW，TK要走先，少了四個人，空間大了，感覺上舒服多了，到我開始大吃大喝。玩到零時散場，開心！
2021.4.23 (Fri)
喜雅
搬到樂翠之後，喜雅自不然要放租，好快亦都已經租出，由於牆紙及玄關牆壁都有破損，租客希望一次過撕去全屋牆紙，再重新上油漆，我當然無異議，始終交屋俾人都希望靚靚仔仔。前日問陳師傅進度如何，佢就話搞掂曬，今日可以上樓取回開門咭及鎖匙。下午請假，先剪髮後上樓睇搞成點，樂翠清潔實在麻麻地。
2021.4.17 (Sat)
Harbour Grand North Point
MM 因家居裝修關係搬到北角君綽酒店暫住，我地一班老友梗係借d意走去探佢，順便飲飲食食。酒店一個月九千五就認真唔貴，房間又有海景。我們在41樓餐廳Le188食4道菜晚餐，加杯酒加多78元，在酒店網站有8折券下載。每人700元左右。
2021.4.10 (Sat)
樂翠台
話咁快第三個回合，其實我住到現在仍然未熟習新環境，小英子更加頭頭碰著黑，撞傷眼，衫吹落街等等，整間屋的裝修一手一腳由她策劃也不順，何況我呢？
下午小英子先到舊居送走洗衣機，順便見一見租客，傾一傾舊居中的一些舊裝設那些可棄，那些不可棄，清楚明確一點大家都好。
今日有三組客，BK，CQ & MM。 1730 CQ率先到場，跟手BK，帶了枝Cloudy Bay Sauvignon Blanc 2019，MM 則帶來一枝1.8公升的Sake，殺曬。時間過得好快，由其是多得枝Sake帶來的酒精度，3 Round之中，要數今晚飲得最厲害，最快唔掂。
