人日團拜

 2023.1.28 (Sat)

環翠園

每逢佳節倍思拎，近好多年，甚麼中秋，聖誕，新年，農曆年必然興起到EC 地頭一聚的念頭，一來她家地方大，易說話；二來真有一點約定俗成的感覺，過時過節去佢屋企，好似去開的便好似一家人似的，好神奇！當然是另外有一些好朋友在發功所致。無論如何都係好開心嘅，一年咁多節日，總有一些可以大家聚一聚的日子。

農曆新年野豬賀兔年

2023.1.25 (Wed)

黃泥涌峽道→大潭水塘道→陽明山莊→大潭上水塘→美景林段→野豬徑→大潭道

新年新開始，點都要揾條路行下慶新春。原本目的地是流水響郊遊徑，但此地近期受到傳媒大力吹捧，恐防新春人潮更盛。流水響交通不便，只有一部52B去得到，都係改動一下行程，下回再訪。今年是兔年，睇過冇乜關於兔嘅行山路線，同樣屬十二生肖的豬就揾到條。野豬徑位於港島，交通十分方便，行程6公里左右，難度不高，可以半晝行完，十分適合明天要返工嘅我倆。

早上十一點半左右起身，先吃過早餐，搭8X點半鐘班車到總站，沿黃泥涌峽道轉上大潭水塘道到陽明山莊前的大潭水塘閘口，開始今日往訪野豬之旅。

過閘口後一直下行至大潭水塘水壩，此部分屬大潭上水塘，好長一段時間冇到過，分外覺得親切。繼續行程轉入美景林段，路段景觀開揚，令人心曠神怡。睇番行程概覽，先過第一個電塔，再過第二個電塔之後就要開始留意右手邊，會有石級出現，就是進入野豬徑的主要分叉路口。跟隨指引而行，過第二電塔之後，立即進入搜尋模式，行約十分鐘左右便見到石級出現，拾級而下，進入林段有清晰路坯，加上絲帶確認路向，好快便上到野豬徑。

野豬徑雖只有260米高，但就坐擁360度環迴靚景，景觀好到不得了。加上此其時正好陽光破空而出，景色更加美不勝收。感受完大自然之美後，循原路返回美景林段繼續前行至往大風坳的分叉路口，轉向下行到大潭道完成今天的訪豬之旅。

沿大潭道轉右行至往赤柱與石澳的分叉路口等9號巴士回家，巴士班次雖然7分鐘一班，但仍然難以滿足到假日人潮，目送滿座不停的9巴經過眼前，幸好尚有空的經過，立即快快手截的士回家。車費46元，1735回到家中。行完山回家感覺真好，加個泡泡浴超正。

大澳落日

2023.1.13-15 (Fri-Sun)

長沙下邨→大澳→長沙下邨

新一年新氣象，公司今年換渡假屋，誤打誤撞之下，申請了今年第一個用渡假屋的名額，全屋都非常之新，充滿新屋的味道。

星期五放下午，相約小英子一起渡海，先到梅窩取匙，再到新渡假屋長沙下邨。今日天氣不佳，取匙後等巴士之時，更落起大雨來。今次搭車醒左，因為有分段收費，在長沙下邨站落車車費平好多。下車後，雨更大，以為有門牌好易搵到間屋，誰不知長沙下邨有兩個段落，中間隔住一段沙灘，我公司間渡假屋就不在長沙下邨站呢一段位置，找一大輪，徒勞無功，問人都唔知，遙望沙灘另一邊，如無意外都係在那個地段，冒著雨重新上路，唔想行沙灘，返回車路行前一個站，又搵，結果都係冇人識我地個門牌，最後都係靠小英子找到公司個大門牌。此其時渾身濕透，超狼狽。其實只要落早一個站，行兩分鐘就到。開荒牛真係唔易做。

晚上就行沙灘過另一邊的長沙下邨，我們呢邊係冇嘢食嘅，兩三間大餐廳都只係開到八點或凖備收工，心不息再行入多少，皇天不負有心人，尚有一間家庭式餐廳仍肯開工，開枝prosecco 抖啖氣，再食燒雞Relax 一下，又幾好吃噃。之後都有兩個少女到來食嘢，餐廳給人感覺非常溫馨細緻，得知明天老闆有個人 Live music，相約明天中午到來，計劃先到此食晏，再到大澳睇日落。

星期六一起身，首先睇天做人，好開心天氣放晴，睇日落的可能性大增，睇完NBA 去食晏，去到老闆剛剛set Mic，今日都係兩枱客，老闆自彈自唱，彈得好唱得好。

去到大澳先買海味，上次在幸運閣食完遼參就好想自己買嚟試試，所以今次除了買花膠之外，要買海參，行了幾間海味舖，哄下哄下，唔識參就問一問老闆娘，才知道要浸發5至6日，又知道了遼參與禿參的分別，禿參貴過南美遼參好多也。結果就兩樣都買了些少試試。買完就行去碼頭凖備睇日落，今日又唔算多人，個夕陽就麻麻地靚，冬日太陽應該係鹹蛋黃嘅色，好可惜今日色太散，唔夠紅，直到落到接近最低點時才變成美麗的紅色，真的是夕陽無限好，只得幾分鐘。

睇完再到上次去過的珍珍餐廳食晚餐，豬頸肉麻麻地。回到渡假屋放下戰利品，到沙灘影下相，好奇怪沙灘大霧到不得了，望上個天又睇到星喎，稍為攝幾張便回屋攤抖休息休息。

十點多催樓上還麻雀，要走嘛，我冇佢地玩到咁盡，早上便會撤退。到梅窩還匙後便搭船返歸，船費47元好貴。今次能夠在臨別之時住到新的渡假屋，特別覺得有意思！