2020.10.31 (Sat)
滬江飯店
有一段時間冇見JP，約佢到我屋企附近的六本木居酒屋食日本嘢，那裏ZK主場，諗住限聚令六人剛剛好，不過遇啱佢兩位唔得閒，唯有六本木就hold住先，先見見面去食大閘蟹。
JP話滬江佢食左10年有多，一到香港已經有嚟幫襯。我未食過，間舖都要靠小英子眼利找到。 JP今日遲到，但有古仔聽，事發經過為，JP call的士，講明要行獅子山隧道，誰不知個的士佬開左車才說要行另一條尖山隧道，點都唔肯行獅子山隧道，JP當然唔肯妥協，拉倒落車，但的士佬要收番佢哋港幣24大元才肯罷休，否則報警。如是者，佢有佢泊低架車報警，幸好架車只係行左幾步，仍然在酒店範圍之內，JP就返酒店大堂對服務生說出事件經過，再call車趕過來尖沙咀滬江。我都聽到火蒲。
我自己好少會搭的士，以前工作關係好多時都要搭的士，但經常遇到的的士司機都係嫌短途，好多說話聽，俾錢仲要受氣，我都唔知為乜。不過好嘅的士司機梗係有，但就唔多囉。值得一提的是當年我媽媽爆血管入院，在銅鑼灣睇完醫生在街上頂唔順，我和老豆掛住扶佢，截的士都好唔易，好不容易有部的士停低，司機大佬落埋車幫手扶我媽媽上車，因為佢見我同我老豆實在好唔識得扶一個完全乏力嘅病人。時值89年6月3日，遊行大過天，處處封路，銅鑼灣去鄧肇堅都唔容易，車我們的的士大哥，見我媽媽超級唔掂，想盡辦法找路行，少少位都偷住去，刮花部車都在所不惜，到醫院門口主動落車幫我們叫護士車我媽媽進醫院內。事隔31年我仍然心懷感激。
滬江的大閘蟹來自太湖，紅花會總舵所在地。今日食的大閘蟹比較細小，膏唔多，叫做今年試過食大閘蟹吧！整個大閘蟹餐的其他菜式就好好吃，蟹粉翅，小籠飽，蟹粉糥米飯，清炒豆苗都好吃至極。食完尚有餘興，到海港城三樓LCX大酒場的清酒自販機試清酒。
用機試酒我就麻麻地，地方好風景好還可以，人多地方窄就可免則免，不過JP就玩得好開心，我飲左頭一輪168元換了10個金幣，5杯清酒，因手機電力嚴重不足，沒有再加一百元換多10個金幣，改為睇酒，見有好嘢八岳，可惜得個空樽，冇得賣，而一些葡萄酒亦是冇標價，等多些貨返才限量試飲及發售。那就唯有買兩枝有標價的清回家享用。
由朝玩到晚，盡興回家。 JP在碼頭搭的士回沙田，我們就搭2號回長沙灣。
