2020.12.31 (Fri)
僑福道8號
天文台話今年係近年最冷的除夕日，我唔知之前有幾度，今年就6至7度，下午都有10零度左右，而且有個太陽，始終感覺都會溫暖很多。今年有限聚令，酒吧冇得開，原本諗住在中環長江中心飲住等小英子再上山頂僑福道EC家，冇得飲唯有買幾枝酒，再到附近的M&S買泡泡浴，之後才行去IFC地下搭專線小巴到EC家。今晚都係近幾年的班底，而近幾年24號到31號，多數有一日會在此度過。鬼叫呢處又大，主人又煮得一手好菜，為人又好客；知道唔嚟都對唔住自己喇！基本班底係少左TJ，兩老要湊孫，今年家庭多了一個新成員，一家齊齊整整過新年都好合情合理。祝愿大家都明天會更好，一年勝過一年；疫情消失，重啟旅遊模式。
2020.12.27 (Sun)
朗濤⇢科學園⇢宜家傢俬
今日天氣好又唔凍，出街好舒服。今日約了裝修師傅小明哥看他新屋貼的牆布。我們未用過牆布，亦未想過用牆布，陳師傅話好用，建議上淘寶買，我們冇興趣上淘寶買東西，一度擱置。不過當知道小明哥都用，而且是在香港買的時候，心動起來。上星期到佢介紹的樓上鋪揀好牆布及窗簾。今日再到他新居參觀參觀南部牆布上牆後的效果！小明哥一大早便在大學站等著我們車我們到他新居朗濤，如果佢唔揸車車埋我倆去，實在唔係咁易乘公共交通工具到達。新居尚未執拾妥當便招呼我們到訪，實在唔話得，太太又鬼咁好客，生果招呼，更加要落足眼力睇睇新居的裝修。的確係唔錯，一幅過冇駁口，而最重要係睇到個收口位。
第二站小明哥帶我們到附近的科學園臨海海濱長廊食晏，長廊上游人不絕，跑步，踩單車的多不勝數。我們揀了一間Grill and Bar 餐廳，環境唔錯，食物可以。之後便找交通工具去沙田宜家傢俬。我未到過科學園，經過科學園的時候，覺得好漂亮，由其是個地標金蛋，好科幻，陽光下金色更為耀眼。唔知點解，若果呢令金蛋建在中國，我便會好唔鍾意呢隻金蛋，可能周邊的建築，環境，市民等都會對整體觀感有很大的影響。沿指示牌，穿過科學園，見到街道，往巴士站方向行進，走左架往大學站的巴士，但就可以搭架往沙田火車站的專線小巴，落車行一分鐘便到宜家。
第三站宜家傢俬，宜家一向是香港市民的大眾傢俬工場，大家都非常喜歡到此購物，最主要是地方夠大，甚麼傢俬款式都有，而且唔買都可以到來參考一下設計家的想像力。我們今次到宜家，主要當然係買傢俬，小英子心中有數，早已將要買的傢俬清單放到電話之上，我們現場睇過心目中的傢俬，覺得OK之後，便可以到服務櫃枱找服務員幫我們落單，方便快捷，好個小英子。攪完落單，大功告成，經過背囊部，見個好大背囊，正是我近期要找的，有九折，更加要買。今日行程，真正的大功告成。
2020.12.26 (Sat)
坪洲
TJ 1111 光棍節當日榮陞爺爺嫲嫲，由於疫情關係，一直諗住BB再大多兩三個月才見面，始終他們家族見面先才是正道也。經過個半月之後，今午BB出城，我們幾個老友就約埋一起，中午入島探B，下半場就行一陣再食下嘢聚一聚。
BB都係太細，我唔敢抱，掂都冇掂，小心係一定要嘅。小朋友好得意，祝佢快高長大，健康成長。
下午遊島，行上山頂看看之前MM想買的樓盤，途中俾條傻佬八婆激親，幸好行一陣氣便消了。之後到街市買一隻活魷魚，50元超抵，12隻日本螺及18隻刀貝；再到泰國菜館買外賣，回TJ家開餐。
2020.12.21 (Mon)
今日約好陳師傅下午2:30 到新屋確認最後水電位，最重要的是要決定買那一款浴缸，好決定來去水位。小英子最後決定放棄獨立缸，改為傳統裙邊缸，陳師傅即時大表讚賞。睡房和書房用新冷氣，日立小涼伴。今日冬至可以早走，去到新屋已經2:45，小英子與陳師傅已經決定好全屋水電掣位。現場所見全屋鋁窗已經換好，客飯廳水電坑位大致上搞妥，感覺進展良好。月尾31號換新石油氣喉，之前要弄好條槽藏喉。
