2021.11.30 (Tue)
Spiga
天氣報告話星期四氣溫將會下降至14度左右,近期下午比較和暖,早晚清涼,假期在家則早午晚都好凍。
近來每個星期都有wine dinner,實在太過有罪惡感,冇辦法,每個活動梗有要到的理由。今晚呢,未參加過呢間酒舖搞的wine dinner 是最主要的原因,而價錢問題,地點問題亦是附加因素,幾個問題加起來的答案就是出現在此。
Spiga 未到過,在陸海通三樓,裝潢很漂亮,就是暗些少,可能高級餐廳大多會將燈光調得低些,以免客人睇得太清楚卦。今晚的坐位很濶落,可能是早報名的關係吧。餐前小吃好快上,之後上菜速度就愈嚟愈慢,燈光暗,添酒少,搞到有點瞌眼瞓。其實飲番少D wine 未嘗不是好事,明晚JY與GK兩人會到我家清理埋星期六剩低的生果和火雞捲。
Spiga的食物質素都唔錯,在我等食之時,俾酒友發現我倆,到我枱來相應。先是ZK的Z單飛到來,原來本來是ZK的,只不過K今晚有家庭聚會,以致Z改約另一朋友到來;之後EB到來,很尷尬地,我認不出他們,其實有時我老人癡呆發作,可能認得出個樣,但就忘記個名。幸好他們不介意,介意都不辦法,我假不來。他們自報大名之後,我的記憶立刻回來,他們坐低傾談一會之後回枱,我稍後再過枱找他們表達我的極不好意思,以影相為記,絕不能再有下一次認不到朋友的事發生。
回位後,另一個朋友又俾小英子認出來,就是才俊E,剛星期六原本有佢份,只不過佢在新界有thanksgiving來不了我家。今次到我過枱找他,好彩佢冇話唔知我係邊位,否則就現眼報得超快。