2021.11.19-21 (Fri)
塘福→大澳→梅窩
星期五一放工便出發搭船往梅窩，再轉車到塘福。約左英英撐枱腳也。 Book了公司在塘福的渡假屋，三日兩夜，今日下午英英已經率先出發到梅窩取匙。
1830船往梅窩，航程55分鐘，1925到梅窩，剛好搭到1930的4號巴士往塘福，車程23分鐘。 16.6船費，3.4車費，全程20元抵搭。
下午小英子已經打電話預約了今晚晚餐的Gallery 餐廳，非常之近我們住的渡假屋。餐廳的餐牌寫在門旁黑板之上，用餐就在戶外，室內是廚房和酒吧。今晚食熟成牛扒大餐，好吃，不過非常之飽。食飽回渡假屋大覺瞓。
早上起身先睇一場黃綠大戰，波士頓主場迎戰湖人，湖人依然打得差到無倫，好難想像是今年的奪冠熱門之一，綠軍第四節開始基本上已經勝券在握，呢排睇NBA餐餐都有成節的垃圾時間，睇得三節波。睇完隨即出發往大澳。
1120車，25 分鐘車程，到埗後先醫五臟，在上次食過的強記冰室食午餐，我今次食咖哩牛腩飯，分量少但就好食，小英子食豬扒撈檬。 55元一個午餐，都幾貴下。今次行另一條線，往嶼北界碑。今日天色實在超靚，行完界碑之後，學日劇的散步人走到阡陌田上行返大澳市集買乾貨。途中見間村屋好熟口面，冇記錯應該係小英子老友小燕子媽媽的居所，考究之下，係對的。今次買了蝦乾，羊肚菌，花膠，銀魚仔等。收鑊甚豐。
1520車出梅窩，今次唔好彩，我們後座坐了一個小孩，非常喜歡說話，佢仲有一個好特別的嗜好，就係録低了地鐵的到站廣播，重複播放。好彩有藍芽在身，聽歌。
今次沿水道行入梅窩住宅區，好靜好舒服。食晚餐前見到梅窩圖書館，有時間便走入去睇睇書，好袖珍，英英借了一本書。 1800左右到碼頭的Kitchen食晚餐，冇預約，好彩我們夠早到，不用等位，我們一路食，一路都有人陸續等位，好旺場。今晚食雞，文魚，分量超大，大滿足。 1940車回塘福。
先到渡假屋放低今午的戰利品，之後到海灘踏浪散步，今晚月亮又圓又光，我們晚餐時睇住個月亮升起，從山後現身的速度好快。如今已經升至高位，好靚。雙腳浸在海水之中，好有治癒感。
星期日一早起身撤退，到梅窩還鎖匙，在碼頭的大排檔食早餐。搭快船回港，船費盛惠41.7。下午全港好馬出場，馬王金槍六十不負眾望，一哩賽再下一城，締18W，15連勝佳績，厲害之極。另一短途新貴八仟師亦清脆俐落擊敗另一短途實力分子緊張大師，四連勝，出道不敗。
沒有留言:
發佈留言