2023.3.3 (Fri)
喜雅
上個月得知喜雅租客要提早幾個月搬走，二月的租金酌情減收，在保證金上扣。約實交吉日期，我就揾返上次幫手放租的經紀K幫手揾新租客。交吉前幾日舊租客未執好屋，要延期，我就改到上星期日交收。見返間屋都好開心，只係幅牆及電掣俾佢D細路貼到滿是比卡超系列貼紙，其餘部分未有細看。經紀 K 又話有幾台客要想嚟睇單位，一手支票，一手門匙（D房門匙尚未俾到我），交接完畢。
接客真係幾疲倦，但又令我可以細心睇到間屋俾舊租客搞到幾爛，個廁所牆磚黑到好可怕，我真係唔知點可以沖涼，坐廁黑掹掹，一盞筒燈唔著，廁所門鎖被去掉；三部冷氣黃黃的；兩個窗加了假窗花，房內牆邊加軟膠；床板膠邊翹起；櫃內滿佈頭髮，好恐怖；露台筒燈唔著；雪櫃門撞凹一大忽，廚櫃內污糟到不堪；大門門阻頂及大門防盜掩唔見左；越睇越拎頭，真唔相信有人可以咁住法。
總共三台客嚟睇單位，個個睇都完全可以接受呢間屋嘅賣相，冇問題。其實原本是四台的，經紀 K 話最有誠意的一台甩底，三台客睇完有兩台客好喜歡，經紀 K 叫我揀客，我又點識揀呢，個客好唔好純靠運氣，諗一諗，就揀第一組睇啱的那家人吧！經紀 K 立即打電話揾佢，講到唔即刻嚟落訂就蘇州咁話，我真係諗唔到間屋咁有魅力，尤其是我剛觀察完一大輪！
臨時租約好快搞妥，新租客只要求搞好床板膠邊，掃掃牆身，廁所門吸咀及附近木板濕位，呢個位我搬扯之時已經好嚴重下，現在當然更加厲害。晚上小英立即揾陳師傅安排執屋事項，陳師傅亦都不負所託，兩日幫我搞掂。嚟緊星期日便會在喜雅正式簽約，去旅行之前能夠順利搞妥新租客事宜，實在值得開心飲番杯！
廁所磚牆令番
廁所門鎖重裝
廁所筒燈
執番冇咁黑
床板膠邊換了
牆身靚靚
露台筒燈未換
重裝路軌
大門門阻頂加番
全屋櫃的內籠全部執番乾淨，人個心情都靚晒
雪櫃門竟然俾小明十爺弄番平整
沒有留言:
發佈留言