2023.4.8 (Sat)
波爾多→法蘭克福→香港
今次波爾多旅程的最後一個早上,起了一個早,0630 起身,執行李,繼而到La Grand'Vigne 食早餐,GK 嚟過食話晚餐好得,好彩我都可以在此食早餐,都好得。預約了0900的計程車凖時來到送我倆到機場,車程30分鐘左右。
上機在Gate 2,boarding time 1200,1230飛。到閘口時見人太多便落樓下坐等上機,1145左右,安檢姐姐嚟到呼籲乘客撤離閘口至安檢區外,傻下傻下離開到候機大堂,機場仍然沒有宣佈因乜解究要疏散已安檢的乘客返回候機大堂。繼續等宣佈派彩,呆等了一個小時左右,終於有廣播呼籲乘客按航班重新開始進行安檢入候機室。機場個廣播聲音實在細聲得緊要,而且講法文多過講英文,人又多又嘈吵,只得找個有利位置見機行事。廣播每宣佈到那一班機可以重新安檢,近閘的乘客朋友便會大聲歡呼。等到後來我們飛的航班都著了燈,要將等的位置靠近番閘口才是上策,幸運地靠近我倆位置的乘客也是飛法蘭克福的年青朋友,見佢哋無神神歡呼起來,我唔知乜事都照跟,佢行我又行,順利過關。
上到機,望望個電話,發現漢莎航空不停有 email 更新起飛時間,1245,1330,1355,1425。只是我的手機在機場收不到網絡而已。飛機上的機組人員廣播就清晰好多,呢場大龍鳳主要原因是機場方面發現有條茂尼無情情在跑道上出現,要搞清楚先可以重新上路。飛得未,未曾住,坐坐下又有新搞作,機長先宣佈發現一個未上機乘客的行李,要等搞清楚先飛得,跟手再宣佈有三個來歷不明行李出現,唔搞清楚係唔俾飛嘅!漢莎真係一間有承擔嘅航空公司,很多時坐在飛機上係只有不明不白地等。望住停在隔鄰的飛機一部一部的離去,幾時飛得呢!
心情一步一步往下沉之際,機內傳來可以起飛的廣播,1545 終於可以飛離波爾多,1725順利飛抵法蘭克福,距轉機的 Boarding time 2005 尚有充足時間可以食個大餐,買下手信。
2050 凖時飛離法蘭克福,夢幻般的波爾多之旅順利落下帷幕!
沒有留言:
發佈留言