2023.4.2 (Sun)
Saint-Émilion
連續3晚住在波爾多愛心旅館，漸有家的感覺，今日離開，不捨之情自然而然。有兩間房真係非常之冇得頂，地方夠大，可以將喼內的行李推曬出嚟。
今日鬧鐘校0700，搭一號線巴士往 Saint Jean 火車站，搭0941－1012 班車往 Saint-Émilion 展開一日右岸之旅。
順利搭上班車，凖時到達Saint-Émilion 火車站，預算在火車站見的士就搭去酒店，冇就用對腳行去。落車後見所有乘客蜂湧出站，大部分人徒步前行入城，我們出站後有個帥哥問搭唔搭車，問價 5 歐羅一位去到酒店，於是乎 10 歐羅便有Tuktuk 將我們送到酒店。到酒店後再與司機哥哥商量1400 在此接我們去Troplong Mondot，達成協議後，先行Check in。
午餐前先到旅遊局取地圖問景點行法，由英英明燈引路行城的左邊景點。從斜路落教堂廣場，經過兩個洗衣池；往觀景台從高處看 Saint-Émilion 城景，無意中發現 Chateau Ausone 就在觀景台旁，順道留影紀念；經荒廢的修道院回到酒店旁的 L'Envers du Décor 食午餐，餐廳坐坐下滿座咁滯，好彩英英有預約。柯打了牛他他，一打生蠔，大大碟薯條，沙律菜，全部都好好吃。上半場完。
下半場從Troplong Mondot 開始，上 Tuktuk 之時下起雨來，到酒莊停雨，時間剛剛好。接待我們的是位很 Nice 的姐姐，先坐高爾夫球車參觀葡萄田，莊園非常之大，分開很多個部分，主要種植Merlot、Cabernet Sauvignon、Cabernet Franc；玩完到Chef Garden 睇農畜業，其中的雞，鴨，豬不是作食物用途，是為了消滅廚餘而飼養的；上車返回主樓，繼續參觀釀酒過程到最後試飲環節，五枝酒 18 Mondot，正酒四個年分 11，14，17 及 19，至愛11，14，及17；19 太young。試完酒，姐姐話試的五枝酒可以全部帶走，太慷慨喇，盛情之下選了一枝14年，又食又拎，好開心。
回城不用走車路，姐姐開了秘密通道給我們，可以經田地回城。回到酒店實在太疲倦了，那都不想去，閉目養神，休息一會再外出晚餐。
回思旅程三日，感覺夢幻，飲酒這麼多年以來，波爾多一直是旅行目標所在，但始終未能成行，疫情3年更加不用想旅行事宜，估唔到上年尾疫情稍為放緩，英英便落足力去籌辦今次波爾多之旅，從機票到酒店住處，餐廳及酒莊參觀，火車巴士路線等等，全部一手一腳負責，認真厲害；我只負責揾幫手 book 左岸酒莊而已。三年冇往外出走，未出發前感覺患得患失，如今已經出發了三日，設身處地，一切順利，事事如意，美好得不像真實！
Book了1915 L'Huitrier Pie － Camille & Soufiane，米芝蓮級數果然名下無虛，應該係我近年吃過最好的一間餐廳，主菜的鱈魚更加深得我心，肉質煮得剛剛好，切下的魚肉一層一層片片分明，鋪面炸得脆脆的羽衣甘藍及 Parsnip 更加好吃到不得了。我們點的是5道菜晚餐，由於從酒莊帶了枝14年 Troplong Mondot 今晚嘆，於是只點了兩杯香檳，由1945食到2145，食到好飽。選7道菜，叫枝酒的話，肯定要食多個鐘，飽到行唔郁。
原本今晚想從高處影Saint-Émilion夜景，不過食完行返酒店後，已經唔想再出外了。飲埋枝14年便休息了，明天要搭0814火車到Saint Jean轉車往Pauillac。
沒有留言:
發佈留言