2023.4.7 (Fri)
Smith Haut Lafitte
延續晴朗好天氣，要離開住了四晚的Bages真的有D唔捨得，只要一想起Bages呢個字，就會記起第一次上705嬸嬸的巴士時，嬸嬸好醒目地一再說Bages呢個字，OKOK之後，放心等佢返嚟接載我倆到Bages。
鬧鐘0630響鬧，搭上 0830酒店幫我們預約了計程車載我們到Pauillac火車站，搭0908班車到波爾多Saint Jean火車站。原定有的士司機會在車站 Hall 1 對面馬路的餐廳前舉起寫上 Caudalie字樣的牌子招呼我們，可能因為我們火車略為延誤了十多分鐘才到站，下車後已見有位叔叔在出口處舉起寫上Caudalie的牌子。接駁超順暢，好快便已經到達酒店，車程只不過20分鐘左右吧。未入得房，餐廳亦都未開，在酒店周圍行了一圈等餐廳Rouge開門。
午餐好豐富，鴨肉漢堡好好吃，食完到Reception取匙睇睇間房有幾靚，比Bages細D，冇大張枱寫嘢。窗外湖景就冇得頂，又可看到冇得食的米芝蓮二星餐廳，滿足一下好奇心。
坐一陣便要再出動去酒莊參加1515 出發的酒莊Tour，要另加44元，接待我們的姐姐好快便講完，極度商業化，1550已經試飲完畢，成為今次行程中，酒莊Tour 完成時間最快紀錄者。今期試飲了20 年白，及16年紅，兩枝都好喝，20年的用黑色酒標，好特別，不是每年，可能5年一輪，又或者10年一輪也說不定。
Spa 唔等人，小英子一早已經預約了玩葡萄籽按摩，拿拿聲回房取短褲出發往美容院。進門之後確認身份及預約項目，取過職員拿來的拖鞋跟隨至更衣室，聽過如何使用Locker，經過16年瑞典一役，每次對付外地Locker 都會加倍小心。呢個Locker 係先按一次號碼作為密碼，再重按一次便可以打開。 Easy！換好短褲，放好衣物，出泳池等叫名通知入房做Spa。與小英子泳池相遇玩冇幾耐便聽見姐姐叫Mr. Chan。入房換咸旦超人底橫，超袖珍，我咁嘅身材，差D唔識著。好彩我係唔知醜嘅，步出後便依言趴底。揀了Natural Music，隨即開始葡萄籽Spa療程，姐姐將葡萄籽反覆塗我全身之後，便著令可以沖身，再換另一條咸旦超人，出去再趴底接受治療，又真係好relax。快樂時光過得特別快，未瞓著已經玩完，出去玩蒸氣浴，按摩池等小英子。
預約了1930晚餐於 La Table du Lavoir，波爾多之旅最後一個晚上，點都要食好D，今晚食套餐，有前菜，主菜及甜品三款，酒開了枝2009年 Lagona Baron，絕對是特價酒牌中的首選。吃大餐之餘，英英更預先通知餐廳我近期生日，結果食完送來生日快樂蛋糕併盤4件作結，為晚餐劃上完美句號。
在波爾多最後一個晚上，回房途中，抬頭晚空，滿是星光，個天都要逼我將帶來未用過的東西拿出來用一下，回房取過腳架與G16，一於影陣星空及夜景才回房沖涼睡覺。
沒有留言:
發佈留言