從來沒有在現場看過龍劍笙, 梅雪詩主演的粵劇, 只是喜歡其師傅任白而已. 不過看見今次的主題濃情詩意半世紀, 想起她們入行已經五十有年, 而人生又真係好難得有五十年, 我自己都只不過48, 尚有兩年至到50, 去到與否都未知呢? 感觸之下, 又記起自己第一次一個人到戲院看的電影就正是她們主演, 吳宇森導演的帝女花, 當時應該係我剛升上中學第一年或第二年, 地點是新都戲院. 自此之後我便有鋪癮經常自己一個人到戲院睇戲.
事不宜遲, 講番今次的四齣折子戲, 第一場 "俏潘安" 之 "店遇". 未聽過, 兼且未看過, 睇番資料才知道是葉紹德為龍劍笙度身訂造編寫的劇目. 龍劍笙不經意流露出來的女兒嬌態, 是我看這齣戲最深的感受, 龍劍笙都好靚, 好有女人味呀. 梅雪詩喚他她作壯士我覺得好得意, 橫睇掂睇龍劍笙的扮相都唔似壯士.
第二場 "蝶影紅梨記" 之 "窺醉". 只曾在 VCD 上看過任白的演出, 對戲中任劍輝的癡兒形象, 深深印在腦海之中. 今晚的龍劍笙又再次令我神遊在戲裏的精詞妙韻之中. 好戲是真的可以百回看.
第三場 "再世紅梅記" 之 "折梅巧遇". 想當初我只曉得任白兩齣戲, "帝女花" 與 "紫釵記" 是也, "再世紅梅記" 是小英子介紹我聽的, 聽過之後, 我便到處搜羅任白的錄音帶, CD, VCD 等, 第一次現場睇粵劇看的也是這齣戲, 當時看的是由蓋鳴輝及吳美英主演的版本, 地點在北角的新光戲院 (可惜明年二月便要拆卸). 今晚四齣折子戲都要數這個劇目是我最熟悉的, 我最喜歡的曲詞是 "我是山西館客喚裴禹", 一問一答皆精警, 我相信一個人無論幾落泊都好, 報上名姓之時也能挺起胸膛, 自豪於顧盼.
第四場 "紅樓夢" 之 "幻覺離恨天". 我本人麻麻地喜歡, 可能唔係太喜歡仙女的歌舞吧, 又缺少了任白戲曲的精髓 "嗔" 與 "癡".
龍梅一次非常精彩的演出, 最可惜的是我和小英子坐在最高處尾二行, 看到最後一場, 眼水已經忍不住洶湧而出, 不能集中精神觀賞.
沒有留言:
發佈留言