2022.5.8 (Sun)
昶
5月第2個星期日,母親節。我和小英子的母親俱已早登極樂,而且不是公眾假期,這個節日對我們來說可說是意義不大,但我都會祝福天下做母親的人幸福愉快,家庭美滿。
幾個星期前在酒組吹雞今日食鐵板燒,結果就母親節吹唔響,冇所謂,問過佳哥話,兩人都可以,唔介意同房的話,我諗唔到要介意D乜,有人陪更加好,佢哋唔介意的話。
超多年冇食鐵板燒,驚油煙味黐身也,而且大多地方狹窄坐位逼仄;食物方面海鮮類我較愛壽司刺身,肉類方而則好肉並不太難購買,可以自煮,係冇左個勁熱扒爐,因此較少食鐵板燒。不過上次經佳哥介紹話此處的鐵板燒師傅手藝超凡,經驗老到,食過必有另一番體驗。搞到我和小英子成日心思思有件事。
昶,鐵板燒有三間房,坐得好舒適,好寬敞。今日同房的係兩母女,母親節style。我呢邊廂就似父親節,橫看豎看,小英子個樣都做唔到我母親。扒爐抽風超強,全部吹向師傅方向的爐邊位,完全感覺唔到油煙味,真係齋坐,飲啖酒,睇師傅表演鐵板燒功架都令人賞心悅目,更何況真係好好吃,是屬於比較輕手,較為文火的煮法。今次招呼我們的是建師傅,上次食壽司都有和我們打招呼,我腦大裝草,要whatsapp小英子問師傅大名,免得唔好意思。建師傅做每一道菜前都會問我們喜歡味道重些少抑或淡些少,會介紹如何煮法,與Omakaze一般的互動模式相似。
鐵板前先幫襯佳哥來個海膽刺身和生蠔嘆嘆先,紫海膽來自青森,配上吞拿三食,海膽先淨食,再配海藻鹽,魚子醬及芥末,最後混合吞拿魚子醬一起吃,超正。華蓮蠔來自長崎,肉質爽脆清鮮,為鐵板燒大餐展開序幕。
今日點了一個龍蝦套餐二人前,牛肉就要日本A4和牛西冷厚燒,自己煮買和牛都好貴,厚燒更考功夫,睇睇建師傅功架。先來一客慢煮刺身級帶子配法國巴黎熟成鱘龍魚子醬,非常非常好吃,流心帶子汁,鮮味無窮,建師傅建議混合之後的龍蝦肉,可以有雙重鮮味享受。睇建師傅用兩隻鑊鏟將龍蝦拆肉,乾淨俐落,佩服佩服。龍蝦未算驚艷,始終曾經在紐西蘭食過的就至美味,不過能夠令我回想起當年美味,呢隻澳洲龍蝦已經達成使命。混合多樣海鮮膏的蝦膏多士,邪惡滋味;之後的清酒煮蜆,蜆有沙,湯清甜,打了點折扣;第二道主菜和牛西冷厚燒,將和牛一分為二,分二次煮,可以慢慢熱食,貼心。用扒爐煎和牛真的零捨不同,肉質都特別嫩滑,配上智利的Auma 2014,酒酸度略高,甜味不突出,平衡方面顯出優雅,與不算太肥膩的和牛拍住上,合格。
食完和牛大致上已近尾聲,嚟個炒野菜清清口,跟手的霧島太陽蛋炒飯先精采,不油不肥膩的炒飯至好吃;再上焦糖多士,唔覺好甜,反而焦得突出,好掂;龍蝦頭腳做麵鼓湯,添鮮;最後就係甜品,我要蘋果雪葩,小英子要檸檬雪葩作結。大滿足的一個下午。多謝佳哥的熱情招待,每次到佳哥的場食嘢都係心滿意足離開。正是感恩知有地,多到望佳樓!
沒有留言:
發佈留言