海灘半天游

 2023.8.6 (Sun)

舂磡角

星期天難得小英子不用上結他堂，一早講好今天會去舂磡角海灘暢泳一番。係驚個太陽太毒，人會多而已。

1400 在柴灣地鐵站搭16M 去舂磡角，乘客原本不多，不過一開車便吸引到隔鄰往赤柱的排隊乘客，即時滿座。我們是搭到總站唯二乘客，可見遊人應該不多。落車往下行向海灘，實在超級曬，換褲後，在猛烈陽光下開始吹脹帶來的浮床，人工氣泵，係費時多少。一路泵一路聽到廣播呼籲各位泳客小心暢泳，因為此沙灘是不設救生員當值，有事就貴客自理。唉！如今真係咁難請救生員?

攜上浮床向海中行去，今日未至於波平如鏡，有少少浪頭，見岸邊有工作人員在清理湧到的水上廢物，有木頭啦，魚網啦，炭啦等等，游出些少會舒服D。今日我都係主要伏在浮床上用雙腳撐下撐下，享受一下浮在水上的感覺，小英子則喜歡游來游去往返浮台岸邊。

轉眼間玩左兩個鐘左右，上岸後，感覺飄浮到頭有點暈，此其時泳客漸漸多起上來，係時候撤退。為浮床放氣都好費時間，氣好難放得盡也，走去沖身及沖浮床，但個身D沙就沖極都有，實在太耐冇到沙灘游玩了。在休憩處的石枱上為浮床再放一陣氣，易於入袋，再慢慢行去搭16M回家，小巴在東區有站落車，非常之方便。

回到家有筋疲力竭之感，好玩就好玩，但就為屋企帶來沙沙沙。今次沒有影相，要藉兩三張網上圖片幫幫手。