大坑團拜

2022.2.2 (Wed)

今日瞓到自然醒，晚上要到CH大坑家拜年，佢屋企可以清晰望到勵德邨，我當年住過的21樓住處亦可見到。約實KC 1630到碳魚取一隻紅米豬，兩煲胡椒豬肚雞煲。從屋企行去碳魚大約25分鐘左右，碳魚我未去過，地址翠灣街18號，位於警察宿舍內，入內要登記身份證，又會有間餐廳開在警察宿舍之內，生客點曉得入內呢？去到已經見到KC正在等緊我們的食物，雙煲已經凖備妥當，但隻豬就未得，此其時間店都有好多等外賣顧客在等。隻豬1700燒起，行到郵局前的士站搭的士，新年期間，的士站變泊車位，唯有睇凖有空的即衝出馬路截之哉。

去到CH屋企，大家正在打牌，我和小英子就邊飲邊等吃。今晚到會14人，食物有一隻紅米豬，兩煲胡椒豬肚雞煲，一個大盆菜，四份龍蝦伊麵。盆菜食物太多，有少少焦香，要將部分食物分配到雞煲之中；四份龍蝦伊麵分量實在太多，唯有取蝦捨面；乳豬太肥，麻麻；胡椒豬肚雞煲一致讚賞。食物豐富到食唔晒，剩下非常之多。食完打陣天九，玩陣遊戲便散Band，快快樂樂度過一晚。