2022.2.1 (Tue)
愉景灣碼頭→寶峰徑→愉景灣眺望台→老虎頭→老虎頭郊遊徑→亞婆塱→銀礦洞→銀礦灣瀑布→白銀鄉→梅窩碼頭
年初一有好節目，2022年hiking第一擊。虎年揀條有關老虎的路線行吓，老虎頭郊遊徑都算應節吧。老虎頭郊遊徑比較特別，話就話3.4公里，但起步點在亞婆塱，終點設在老虎頭山頂上，兩邊都沒有交通工具可達，上山落山都需要3公里以上，要行就起碼要行10公里。這條路線其實不是特別想在大年初一行的，只不過對上兩次都因天氣關係取消而押後到今日而已。說實在今天起身也不見得是好天氣。
早早起身望望個天，唔算好天，但可以接受，冇落雨便出發，搭780，0935上車，0952到中環3號碼頭，即是往愉景灣碼頭，超快，趕上1000船。假期船費好貴，成43元，20分鐘航程到愉景灣，落船有少少雨，好大風，見麥當奴便就在此食個熱香餅大早餐，一邊食，一邊望向窗外，樹搖得好厲害，好大霧，天氣不佳，祈求不要下大雨。
食完早餐，出發。經愉景灣廣場往愉景灣道，過馬路後轉上愉景山道，再轉入寶峰徑，沿梯級直上，到頂左轉便是山徑入口。路口有指示牌往愉景灣眺望台，行程約500米。行到盡處右轉上樓梯後，沿引水道直行轉泥路山徑，到垃圾桶分叉路轉右直上。上行不久，意外發生，一隻大狗不知何時出現在梯級之上，以居高臨下之勢，迅速撲至，正是狗頭與人頭平衡對歭，大狗加力之下，鄙人實在抵受不住呢股沉重力量，左膝有傷冇力，唯有借勢向右方山坡倒下，碌下一小段即抓住一堆樹藤止住跌勢。呢隻大狗名叫泰臣，我聽佢主人咁叫佢嘅，狗如其名，極度活躍，重秤。其主人拉起我問我傷勢，我檢視一下自己狀況，成身泥，左腳腕有少許扭傷，唔開心就梗係，見泰臣重係好開心，我諗佢都冇心嘅，但就真係諗唔出佢望見我點解會咁興奮。見泰臣主人好擔心我傷勢，連聲問我有冇大礙，我話OK之後便繼續上路，不想再虛耗光陰。一邊上一邊踏順番左腳腕腳筋。上到大涼亭小休一會算是回一回氣，但天氣實在太凍太大風，眺望台都唔去便繼續上山找老虎頭。
越向上行天氣越惡劣，大霧又大風，視野不到十米，全是崎嶇山路，行到上老虎頭，真係人唔似人鬼唔似鬼，霧水jel頭，影番張靚相留念。老虎頭上乜景都冇，凍到冇得抖，要繼續行保持體溫。
落山永遠都係最悲涼嘅，震到對膝頭屈唔到，不過要到嘅始終都會到，1630左右落到最後一個景點銀礦灣瀑布，找到廁所用水抹一抹個頭，在亭內真真正正休息個10分鐘，再慢慢行到梅窩碼頭。竟然剛剛趕上1720的快船，終於可以舒舒服服坐低休息，好疲倦。
回到中環，搭788到富景BK家食飯。唔使煮食大餐真好！
沒有留言:
發佈留言