2023.6.24 (Sat)
昶
冇揾佳哥一排，難得收到通知話嚟緊會搞個劏魚晚宴，問有興趣否？二話不說便報名兩位。好朋友，有時間就一定會去，價錢看過便算，我窮都唔志在俾多少少食好D嘅，更何況佳哥又點會待薄我呢！多數都係我著數多D。
去到餐廳，和一班工作人員打個招呼，寒喧一番，見佳哥異常忙碌，坐低叫枝Sake飲下先，等佢忙完才Say hi。
我倆今晚坐鐵板燒房，聽佳哥忙完之後同我講，三間鐵板燒房，一間用來劏魚用；一間隔開424，我和小英子係2；一間聽講係地產界人仕。吧枱21人。爆場。見佢神情疲憊，原來今晚餐劏魚宴能夠順利進行，實在有不為人知的難度。早上佳哥收到食環電話訊息，要將我們今晚凖備解剖的吞拿魚取去檢測輻射，冇得say no，最多幫你買住先，食環呢招實在太惡，太蠻喇！條魚昨日到就應該昨日驗，香港咁危險，出事的話難保不是在香港染的嘛。後來聽南師傅講，食環近期抽驗日本來的水產非常嚴格，急用的如劏魚呢家嘢，佢哋就會預早兩三日運到，多些少時間走盞。官字多你一個口就夠了，我有我驗，你有你補飛。幸好最後靠著有實力人仕，在日本找到一條61KG 的吞拿作為替代品，嗱嗱聲空運嚟香港，我們今晚才有得吃，否則大事不妙也！我小人小面，就冇所謂啫，其他到會的，有很多可是大有來頭的。
聽完才知道有呢個驚險過程，難得自然更加珍惜，要全程投入睇劏魚，聽講魚，食條魚。今晚請來兩位專家到場，一位南師傅的老闆wan仔，一位大學教授講解吞拿身體構造及習性。南師傅係佳哥老死，經常會借助佳哥，Lee師傅、阿劍等到佢哋觀塘間舖幫手劏魚，所以今晚專誠過嚟睇睇，順手攞幾枝酒到來探班，冇帶酒的也可大喝特喝。
我們隔鄰的鐵板燒房就有自攜香檳到會，玩得極之快樂，而越快樂聲浪就越加響亮，都幾噪音下。而由於我們呢間房有四個客是他們間房的朋友，用來間房的趟門就冇閂到，方便他們行來行去，冇間隔聲浪音量更加強勁，幸好後來他們之中其中一位仗義關門，耳根才可稍為抒緩一下。有時人多聲大係好難避免，我班酒鬼朋友聚埋一齊都差不多嘈及癲。
最後終於有機會與佳哥坐低飲番兩杯傾下偈，見佢疲到斟酒落杯都唔凖，煩惱應該就唔止救得番呢餐咁簡單，不作深究，最緊要往後仍然可以有得嚟吃。
沒有留言:
發佈留言