窺伺藍色的藍

2022.6.11 (Sat)

柴灣青年廣場

疫情以來2020年未睇過舞台劇，上年睇過一次，跟住第五波殺到，預訂了的演唱會及話劇亦都相繼被逼取銷。如今舞台重開，自不然要多多捧場，今年睇的首部話劇是浩基老師的作品，窺伺藍色的藍，一部短篇作品，我自己睇書就覺得好複雜，好有興趣睇睇導演怎樣改編，演員如何演繹。

青年廣場好近屋企，行去15分鐘左右，我未去過，小英子上年去過。好早去到，未入得場，如是周圍看看消磨時間，感覺上整體都幾有藝術氣息，地方唔錯。

入到場，等了一會便正式開場，而表演開始後，陸陸續續有人進場，令我想起之前到牛池灣劇場睇話劇，表演開始後，我走出去小個便都要等唔知幾耐與其他遲到場的一起進場。真係各處鄉村各處例！

呢部劇，係一部讀劇，我事前唔知道，演員們把聲都好得，但坐喺度，手拿稿紙我就覺得怪怪的。一個小時好快過去，演出算OK，但我就有點兒一頭霧水，消化不了。演出完畢後，導演上台謝幕之時，才知道莫理斯會在今晚那一場表演完畢後和觀眾見面，真有緣慳一面之慨！