2024.3.20 (Wed)
香港→高松→鷲羽山
WASHU BLUE RESORT 風籠かさご
雨轉晴
上次遊四國揸住本四中國自駕遊的旅遊書作為參考，實用性十分之高，四國大部分的旅遊點串連得很成功，至於另一中國部分就睇過後好想見識一下，於是便趁住個國際牌尚未過期，餘溫尚存之際，嗱嗱聲籌備多次日本行，食住個勢也。
早上0940機，一般叫的士去機場，今次係八折的。 0600 的士到，好早便到達機場，下次可以改為提前兩個半鐘到便可，機場Canteen 食早餐，我食糯米雞，凍茶少奶；英英食新嘢，沙爹牛肉腸粉， 熱啡。 在候機室 hea hea 下，好快就夠鐘起飛，1410 凖時到達高松機場，航程中，坐在我後排的兩位女士十分之健談，完全未停過，好厲害。我和英英分開坐29B 及30B，環顧全機，差不多相識的都係分開坐，全因揀位要加錢，我估我後排三位健談之士係有加50元嘜位的。班機降落後，機長宣佈氣溫6度有雨。過完關立刻便見到Toyota Rent a Car 個攤位，出示預約email 後便可以等車去高松舖取車。高松機場半年前才到過，很有親切感。今次車款黑色Pixis，電子撻掣，冇車匙，用腳掣，之前揸過一次，接觸不多，要多少適應期。
今晚入住鷲羽山 WASHU BLUE RESORT 風籠かさご，行經瀬戶大橋之時，橫斷風力極之強烈，要用雙手握緊軚盤才能穩住車身搖晃。到達飯店已經1700，放低行李便到7樓展望風呂浸個靚溫泉先，要把握住緊有的落日餘暉也。1830回房放低毛巾後落二樓餐廳食大餐。夕食我們沒有預料會食Buffet，所以侍應姐姐講解之時，我們一頭霧水，最終望下人哋，行幾個圈後便知道是懷石料理+Buffet Style。我們對 Buffet 麻麻地，英英亦唔道係食 Buffet 為主，否則就不會考慮呢間旅館，因為價錢算貴。食完回房拿相機上7樓睇下有咩影才發覺相機冇插記憶卡，回房check 下部G16個相機袋，好彩有兩張Spare，否則帶部機嚟冇得用，多掃興呢 ！ 晚上開明天作戰會議，早上行程會有變更。
沒有留言:
發佈留言